Hjálp!

Ný hrunstjórn er í pípunum. Sjálfstæðisflokkurinn hallar sér að Samfylkingu. Þá eignast einkaaðilar arðinn af nýtingu orkuauðlindanna, sægreifarnir halda áfram að selja aðganginn að auðlindum þjóðarinnar og stinga í rassvasann eða koma honum til Tortóla. Stórkallaleiðirnar fara aftur á fullt skrið, skattar verða lækkaðir á þá sem eiga einhverja peninga o.s.frv. Guð hjálpi okkur!

Hvað næst?

Búið er að taka af þjóðinni lýðræðislagar kosningar vegna formgalla, þrátt fyrir að engar ábendingar hefi komið fram um kosningasvik.

Búið er að taka kjörbréf af lýðræðislega kjörnum fulltrúum þjóðarinnar vegna formgalla í kosningum þrátt fyrir að allar líkur séu á að þeir hafi verið rétt kjörnir.

Að óbreyttu kemur stjórnlagaþing ekki saman fyrir miðjan febrúar eins og kveðið er á um í lögum. Allt stefnir í þvingað lögbrot vegna ógildingar kosningar til stjórnlagaþings.

Hæstiréttur landsins vitnar með ónákvæmum hætti í lög um stjórnlagaþing í dómsorði sínu vegna kosninga til þingsins.

Hæstiréttur Íslands er pólitískt skipaður og eru 8 af níu dómurum landsins skipaðir af sama flokknum. Rétturinn er því ekki sjálfstæður dómstóll heldur framlenging á valdi eins flokks.

Hæstiréttur hefur gefið hættulegt fordæmi með hörðum dómi sínum vegna formgalla í kosningum. Þetta gefur nýjan möguleika á að fella úr gildi óhagstæðar kosningar með lagaklækjum.

Samtök atvinnulífsins beita stjórnvöld þvingunum í þágu sérhagsmuna. Dæmi um þetta er að knýja fram ákvæði um stóriðjuframkvæmdir í svo kölluðum Stöðugleikasáttmála og að hóta því að ekki verði samið um kaup og kjör nema kvótagreifar haldi sínu.

Jafnræðisregla stjórnarskrárinnar er þverbrotin. Sumir bera ábyrgð á skuldum sínum en aðrir ekki og sumir njóta launaleyndar en aðrir ekki, svo dæmi séu tekin.

Hvað næst?

Sjá grein Reynis Axelssonar

http://silfuregils.eyjan.is/2011/02/03/reynir-axelsson-athugasemdir-vid-akvordun-haestarettar-um-ogildingu-kosningar-til-stjornlagathings/#comments

Óvænt gjöf

Í dag fór ég að kjósa mér fulltrúa á stjórnlagaþing. Alveg óvænt gilti atkvæði mitt meira en helmingi meira en búast mátti við. Um 60% þjóðarinnar treystu okkur sem kusu til að kjósa fyrir sig og ráða hverjir sitja þingið. Ætla má að þetta fólk vilji ekki jafna vægi atkvæða þegar það eftirlætur öðrum allt atkvæði sitt. Eru það skilaboðin til þingmanna frá þessum hópi að þeim sé sama um lýðræðið? Eitt er víst að ekki þýðir fyrir þetta fólk að kvarta undan einu né neinu. Það fékk tækifæri til að kjósa sér fulltrúa til að smíða nýjan lagagrundvöll, en gaf það frá sér til okkar hinna

Tímamót í lífi þjóðar

Dagurinn í dag er einstakur í lífi ungrar þjóðar. Í dag fáum við að kjósa um nýtt upphaf að því samfélagi sem við lifum í. Það er von mín og trú að þjóðin muni velja fulltrúa sem eru vandanum vaxnir. Fólk sem hefur að leiðarljósi að engin keðja er sterkari en veikasti hlekkur hennar og hugsar um hagsmuni allra Íslendinga í nútíð og framtíð. Fögnum þessum fallega degi og mætum á kjörstað.

Teningunum kastað

Nú líður að stóra deginum og ég bið þess að þeir fulltrúar sem þjóðin velur til setu á stjórnlagaþingi reynist vandanum vaxnir. Nú verð ég að treysta á að mér hafi tekist að vekja athygli á framboði mínu og baráttumálum, þrátt fyrir að hafa ekki keypt auglýsingar. Ég verð líka að treysta á orðspor mitt og að þeir sem þekkja mig og treysta, hafi talað máli mínu. Ég óska þjóðinni guðs blessunar á þessum stóru tímamótum og hvet alla til að kjósa á morgun. Öðrum frambjóðendum þakka ég fyrir góða og drengilega kosningabaráttu.

Til kjósenda minna

Fyrir mig sem er óþekkt kona og hef ekki keypt auglýsingar er mikilvægt að þið setjið mig í fyrsta sæti til að eiga möguleika. Kjósið svo endilega sem flesta, þá er engin hætta á að atkvæði ykkar nýtist ekki til fulls.

Sjá upplýsingar um stefnumál mín í fyrri greinum hér á síðunni á

http://www.ruv.is/stjornlagathing/frambjodendur?nr=6681

http://www.kosning.is/stjornlagathing/frambjodendur/#index:E

Þú færð það sem þú vilt

Nú hefur þú val. Viltu lýðræði eða flokksforingjaræði? Viltu eiga auðlindirnar eða viltu gefa þær auðhringjum? Viltu varðaveita náttúruna að viltu sóa henni? Viltu vera virkur þátttakandi í lýðræðisþjóðfélagi eða fýlupoki heima í stofu.
http://kjostu.org/

Arðurinn til þjóðarinnar

Kæru kjósendur! Nú á lokasprettinum langar mig að árétta að ég mun leggja höfuð áherslu á að þjóðin njóti ávallt sjálf ávaxtanna af auðlindum sínum. Í nýja stjórnarskrá þarf að setja inn ákvæði sem kemur í veg fyrir að arðurinn af þeim renni til auðhringja, erlendra eða innlendra. Einnig að auðlindirnar verði nýttar með sjálfbærum hætti. Sjá nánar um stefnumál mín í fyrri greinum hér á síðunni.

Lýðræði

Setja þarf skýrar reglur um lýðræði í nýrri stjórnarskrá. Taka fram að valdið komi frá þjóðinni og kjörnir valdhafar stjórni í umboði hennar. Mikilvægt er að þjóðin og minni hluti Alþingis geti kallað fram þjóðaratkvæðagreiðslu í mikilvægum málum og að stjórnarskrárbreytingar fari í þjóðaratkvæðagreiðslu í stað óbeinna kosninga um þær eins og núgildandi stjórnarskrá segir til um. Einnig þarf að setja reglur um skoðanakannanir í aðdraganda kosninga og eftirlit með þeim sem framkvæma þær. Jafnframt þarf að tryggja gegnsæi og stemma stigu við fjármagni í kosningabaráttu. Þetta þarf að gera til að allir hafi jafna möguleika á að koma sér á framfæri og til að koma í veg fyrir óeðlileg áhrif fjársterkra eða valdamikilla aðila á frambjóðendur.

Enginn veit hvað átt hefur fyrr en misst hefur

Náttúra Íslands er dýrmæt auðlind sem margir Íslendingar taka ekki eftir og telja sjálfgefna. Sannast sagna dettur manni enn í hug að fólk lifi eftir gamla orðtækinu sem segir ,,Lengi tekur sjórinn við“ eða það notar strútsaðferðina að stinga höfðinu í sandinn og sjá hvort ruslið og mengunin sem það skilur eftir sig hverfi ekki bara af sjálfu sér. En það gerist bara ekki. Við þurfum sjálf að hafa fyrir því að hreinsa upp eftir okkur skítinn og koma í veg fyrir að hann verði til, annars getum við staðið frammi fyrir því einn daginn að við eigum ekki lengur ómengað vatn, loft, land og sjó. Þá verð ég kannski komin undir græna torfu, en vil ég láta afkomendur mína hirða upp eftir mig skítinn og þurfa að neyta mengaðra matvæla? Svarið mitt er nei. Hvert er svarið þitt? Má bjóða þér ákvæði um sjálfbærni í nýrri stjórnarskrá?